ბათუმის ბოტანიკური ბაღი მრავალფეროვნებითა და სილამაზით უნიკალური გამწვანებული პარკია შავი ზღვის სანაპიროზე. იხილეთ Sputnik-საქართველოს ფოტოლენტაში, როგორ გამოიყურება აჭარის ბოტანიკური ბაღი დღეს
აჭარის ბოტანიკური ბაღი, რომლის ისტორიაც უკვე საუკუნეზე მეტს ითვლის, ბათუმიდან 9 კილომეტრში მდებარეობს.
ბაღის მდიდარი ფლორა ცხრა ფიტოგეოგრაფიული განყოფილებიდანაა მოკრებილი, მისი კოლექცია 1800 ტაქსონომიური ერთეული მცენარისგან შედგება, მათგან 90 კავკასიური წარმოშობისაა, 1540 ტაქსონი კი სხვადასხვა უცხოურ ფლორას წარმოადგენენ.
აჭარის ბოტანიკურ ბაღში ასევე ხორციელდება სხვადასხვა პროგრამები ადგილობრივი ფლორის მცენარეების, დეკორატიული მებაღეობისა, დეკორატიული მეყვავილეობისა და ტურიზმის დაცვის მიზნით. ბაღის პერსონალი მონაწილეობს სხვადასხვა თეორიულ და საექსპერიმენტო მეცნიერულ პროექტებში.
ბათუმის ბოტანიკური ბაღი სოფლის მეურნეობისა და ბიოლოგიური ცოდნის გასავრცელებლად მნიშვნელოვანი წყაროა. მას აქვს კავშირი ბოტანიკურ ბაღებთან, უნივერსიტეტებთან და სხვა სამეცნიურო-მკვლევარ დაწესებულებებთან 140-ზე მეტ ქვეყანაში, რომლებსაც თანამშრომლობის მემორანდუმი აქვთ გაფორმებული.
1998 წლიდან ბათუმის ბოტანიკური ბაღი მსოფლიოს ბოტანიკური ბაღის მცენარეთა დაცვის საერთაშორისო კავშირის (BGCI) წევრია.
ბოტანიკურ ბაღს აქვს სამეცნიერო ბიბლიოთეკაც. ბაღი გამოსცემს სხვადასხვა სამეცნიერო, პრაქტიკულ, მეთოდოლოგიურ და შემეცნებითი ხასიათის ლიტერატურასა და გაზეთს „ბოტანიკური ბაღი“.
2012 წელს ბაღის 100 წლის იუბილე მრავალი ღონისძიებით აღინიშნა. 2013 წლის მაისში საზეიმო ღონისძიებები საერთაშორისო მეცნიერულ-პრაქტიკული კონფერენციით დასრულდა.