ის საშინელი ღამე დიდხანს ემახსოვრებათ თბილისელებს. 13 ივნისს, გვიან ღამით ძლიერი წვიმისა და ქალაქთან ახლოს მეწყრის ჩამოწოლის შედეგად მდინარე ვერე ადიდდა, კალაპოტიდან გადმოვიდა და თბილისის ცენტრი დატბორა. იხილეთ „Sputnik-საქართველოს“ ფოტომასალაში წყალდიდობის შედეგად გამოწვეული ნგრევის სურათები.
თავიდან წყალმა სვანიძის ქუჩას გადაუარა და თამაზ ელიზბარაშვილის ძაღლების თავშესაფარი დაანგრია. ბევრი ცხოველი დაიღუპა, მათ შორის დათვებიც. შემდეგ წყლის ნაკადი, ადგილობრივთა სახლების გავლით, ხეობაში დაეშვა და გზად ყველაფერი გაანადგურა.
ახალ შემოვლით გზაზე დაზიანდა ათობით ავტომობილი. ყველა ადამიანმა ვერ შეძლო ადგილის დატოვება, მათი ნაწილი იმ ღამით დაიღუპა. წყლის ნაკადი ამ დროისთვის შეიჭრა ჯერ „მზიურში“, შემდეგ თბილისის ზოოპარკში და მისი ტერიტორია თითქმის მთლიანად დატბორა. ბევრი ცხოველი დაიღუპა, ზოგიერთი მათგანი კი ვოლიერის გარეთ, ქალაქის ქუჩებში აღმოჩნდა.
წყალდიდობის ბოლო წერტილად იქცა გმირთა მოედანი და მისი მიმდებარე ტერიტორია, ასევე მტკვრის მარჯვენა სანაპირო. წყალმა გაანადგურა ინფრასტრუქტურის ბევრი ობიექტი, სახლები, გზები, ხიდები, გვირაბები, საკომუნიკაციო სისტემები.
წყალდიდობის შედეგად დაზარალდა 200-ზე მეტი ოჯახი. დაიღუპა 21 ადამიანი, ორი კი დღემდე უგზო-უკვლოდ დაკარგულად მიიჩნევა.