თბილისი, 14 ივნისი — Sputnik. კომუნიკაციების მარეგულირებელმა ეროვნულმა კომისიამ სატელეკომუნიკაციო კომპანია Magti-ს 10 წლით გაუხანგრძლივა MagtiFix-ის მომსახურების ლიცენზია, იუწყება ტელეკომპანია Rustavi2 კომისიის თავმჯდომარე კახა ბექაურზე დაყრდნობით.
კომპანია Magti-ს მომავალი კვირიდან CDMA ტექნოლოგიაზე ლიცენზიის ვადა ეწურებოდა. ვადის ამოწურვის შემდეგ კომპანია ვეღარ მოემსახურება MagtiFix-ის აბონენტებს. ეს აბონენტები, ძირითადად, აფხაზეთისა და ცხინვალის რეგიონის ადმინისტრაციულ საზღვრებთან ახლოს და მაღალმთიან რეგიონებში მცხოვრები ადამიანები არიან.
მარეგულირებელი კომისიის გადაწყვეტილებით, კომპანია პირველი ორი წლის განმავლობაში აბონენტებს წელიწადში 100-100 ათასი ლარის ოდენობის თანხით მოემსახურება. ამასთან, კომპანია ვალდებულია ამ დროის განმავლობაში აბონენტებს MagtiFix-ის ალტერნატივა შესთავაზოს.
„ჩვენი ვარაუდით, ორი წელი საკმარისია იმისთვის, რომ არსებულმა მომხმარებლებმა „მაგთიკომის" ეს სერვისი ჩაანაცვლონ სხვა სერვისებით", – განაცხადა ბექაურმა.
CDMA – კავშირგაბმულობის ტექნოლოგიაა, ჩვეულებრივ, რადიოკავშირის, რომლის დროსაც გადაცემის არხებს აქვს სიხშირის საერთო ხაზი, მაგრამ სხვადასხვა კოდირებული თანმიმდევრობა. ყოფით დონეზე განსაკუთრებული პოპულარობა მოიპოვა ფიჭური მობილური კავშირის გამოჩენის შემდეგ.