თბილისი, 13 ივნისი – Sputnik. საქართველოს ხელბურთის ნაკრებმა თბილისში მიმდინარე IHF ახალგაზრდა სახელმწიფოთა ტურნირის ჯგუფურ ეტაპზე აშშ-ის გუნდი დაამარცხა ანგარიშით 28:22 და ამ მოგებით ნახევარფინალში გადასვლა უკვე გაინაღდა.
საქართველოს ნაკრებში ყველაზე შედეგიანი მოთამაშე გიორგი ცხოვრებაძე აღმოჩნდა. მან მეტოქის კარში ცხრა ბურთი გაიტანა. ოთხ-ოთხი ბურთია ირაკლი ჩიქოვანისა და თეიმურაზ ორჯონიკიძის ანგარიშზე.
ამ წარმატების წყალობით ქართველმა ხელბურთელებმა ტურნირის ნახევარფინალში თამაშის გარანტია მიიღეს, სადაც საქართველოს ნაკრების გარდა დროზე ადრე კიდევ ორი გუნდი მოხვდა – ბულგარეთისა და კუბის ნაკრებები. ბოლო ნახევარფინალისტის ვინაობა მოგვიანებით გაირკვევა.
საქართველოს ნაკრებისთვის აშშ-ზე გამარჯვება ტურნირზე მეოთხე წარმატებული ასპარეზობაა. პირველ დღეს ნიკოლა მაქსიმოვიჩისა და ბექარ ორჯონიკიძის გუნდმა ნიგერია 27:14 დაამარცხა, შემდეგ მალტა - 39:13, მესამე ტურში კი ირლანდია - 37:17.
ჯგუფური ეტაპის ბოლო დღეს, 13 ივნისს საქართველოსა და ბულგარეთის ნაკრებები ერთმანეთს შეხვდებიან და B ჯგუფის გამარჯვებულს გამოავლენენ.
ახალგაზრდა სახელმწიფოთა ტურნირი IHF ხელბურთის საერთაშორისო ფედერაციის ეგიდით მესამედ იმართება. მსგავსი ჩემპიონატების მიზანია ხელბურთის განვითარება და პოპულარიზაცია ისეთ ქვეყნებში, სადაც სპორტის ეს სახეობა ფართოდ არ არის გავრცელებული.