თბილისი, 7 მაისი – Sputnik. სახელმწიფო უსაფრთხოების სამსახურის (სუს) უფროსის მოადგილედ 72 წლის გენერალ-მაიორი შენგელი ფიცხელაური დაინიშნა, ნათქვამია უწყების ვებგვერდზე გავრცელებულ განცხადებაში.
შენგელი ფიცხელაური 2019 წლის იანვრიდან შინაგან საქმეთა მინისტრის მრჩეველი იყო. მრავალი წლის განმავლობაში ძალოვან უწყებებში სხვადასხვა პოსტებზე მუშაობდა.
1999 წელს დაჯილდოებულია მედლით „საბრძოლო დამსახურებისათვის“, 2002 წელს - „ღირსების ორდენით“.
ფიცხელაური არის ივანე ჯავახიშვილის სახელობის თბილისის სახელმწიფო უნივერსიტეტის დოცენტი, სამართლის დოქტორი - პროფესორი.
2009 წლიდან დღემდე გურამ თავართქილაძის სახელობის თბილისის უნივერსიტეტის, სამართლის ფაკულტეტის დეკანია. 1993-2016 წლებში ძიუდოს ეროვნული ფედერაციის ვიცე-პრეზიდენტი იყო.
2016 წლიდან დღემდე ასევე საქართველოსა და აღმოსავლეთ ევროპის რეგიონალური ანტიდოპინგური საერთაშორისო საბჭოს თავმჯდომარეა.
რატომ გამოიყენეს ახალ ზელანდიაში ტერორისტებმა ქართული წარწერა? >>
ფიცხელაური საერთაშორისო სპორტის ოსტატია და სამგზის ევროპის ჩემპიონია ძიუდოში.
ამგვარად, ფიცხელაური სუს-ის უფროსის, ვახტანგ გომელაურის მეოთხე მოადგილე გახდა. გომელაურის პირველი მოადგილეა გრიგოლ ლილუაშვილი, მოადგილეები - ალექსი ბატიაშვილი და ალექსანდრე ხოჯევანიშვილი.