საქართველოში ჩამოფრენას მსოფლიოს უფრო მეტი ქალაქიდან შეძლებენ

თბილისი, 2 მაისი — Sputnik. საქართველოს საერთაშორისო აეროპორტებიდან 2019 წლის ზაფხულის სანავიგაციო სეზონზე (მარტის ბოლო კვირიდან ოქტომბრის ბოლო შაბათამდე) კვირაში საშუალოდ 590 რეისი განხორციელდება – გასული წლის ანალოგიურ პერიოდთან შედარებით 9%-ით მეტი.

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტომ დაამტკიცა ავიაკომპანიების ზაფხულის სანავიგაციო სეზონის ფრენების გრაფიკი, ნათქვამია უწყების განცხადებაში.

აღნიშნულ პერიოდში ავიარეისებს განახორციელებს ორი ქართული და 39 უცხოური ავიაკომპანია, მათ შორის, სამი სატვირთო.

საქართველოს საერთაშორისო აეროპორტებით 2019 წლის პირველ კვარტალში 1 მილიონზე მეტმა ადამიანმა ისარგებლა, რაც გასული წლის ანალოგიური პერიოდის მაჩვენებელზე 21%-ით მეტია.

თბილისის საერთაშორისო აეროპორტიდან რეგულარული სამგზავრო რეისები 52 მიმართულებით შესრულდება.

ავიარეისების მიმართულებები თბილისის აეროპორტიდან

ქუთაისის საერთაშორისო აეროპორტიდან აღნიშნულ პერიოდში ფრენები შესრულდება 28 მიმართულებით.

ავიარეისების მიმართულებები ქუთაისის აეროპორტიდან

ბათუმის აეროპორტიდან ზამთრის პერიოდში რეისები შესრულდება 14 მიმართულებით.

ავიარეისების მიმართულებები ბათუმის აეროპორტიდან

თბილისის საერთაშორისო აეროპორტიდან 2019 წლის ზაფხულის სეზონზე კომპანიები Silk Way Airlines, Cargolux და Turkish Cargo განახორციელებენ რეგულარულ სატვირთო რეისებს შემდეგი მიმართულებებით: ბაქო, ლუქსემბურგი (თბილისი-თურქმენბაში) და სტამბული.

სულ 2019 წლის პირველ კვარტალში საქართველოს აეროპორტებში განხორციელდა 5,2 ათასი სამგზავრო და სატვირთო რეისი, რაც გასული წლის ანალოგიური პერიოდის მაჩვენებელზე 24%-ით მეტია. აქედან რეგულარული რეისი იყო 4 640, ხოლო ჩარტერული – 560.