თბილისი, 21 აპრილი - Sputnik. ამ წუთებში არავინ ვაპირებთ მტყუან-მართლის ძებნას, ახლა უნდა გავჩერდეთ და გავნაგრძოთ მოლაპარაკებები, განაცხადა შინაგან საქმეთა მინისტრმა გიორგი გახარიამ მას შემდეგ, რაც ის პანკისის მოსახლეობასთან შეხვედრიდან გამოვიდა.
მინისტრის თქმით, მოლაპარაკებების შედეგები სრულად საზოგადოებისთვის დაახლოებით ნახევარ საათში გახდება ცნობილი.
„ჰესის საკითხი გადავდეთ. ჰესის მშენებლობა გაგრძელდება მაშინ, როცა ამას მოსახლეობის 90 პროცენტი დაეთანხმება... მე ახლა ჰესის გამო არ ამოვსულვარ აქ. იმიტომ ამოვედი, რომ ქვები ესროლეს პოლიციას... მანახეთ, თუ ვინმეა ადგილობრივი დაზარალებული და იქაც მივალ და იმასაც მოვეფერები“, - უთხრა მინისტრმა ადგილობრივებს.
გიორგი გახარიამ მადლობა გადაუხადა პანკისელ უხუცესებს შეხვედრისთვის და კიდევ ერთხელ განმარტა, რომ დღევანდელი შეხვედრა იყო უმძიმესი, ვინაიდან მოხდა ის, რაც არ უნდა მომხდარიყო. თუმცა „ბრძენი უხუცესების“ წყალობით, დაპირისპირება შეწყდა.
პანკისის ხეობაში, მდინარე ალაზანზე მცირე ჰესის „ხადორი 3"-ის სამშენებლო სამუშაოების განახლებას ადგილობრივი მოსახლეობის პროტესტი მოჰყვა. დღეს სოფელ ბირკიანში აქციის მონაწილეებსა და პოლიციას შორის დაპირისპირება უკვე ორჯერ მოხდა.დაშავებულები არიან როგორც ადგილობრივები, ისე სამართალდამცველები და ასევე ტექნიკა.
პანკისის ხეობაში ჰესის მშენებლობა გასული წლის ივნისში მოსახლეობამ შეაჩერა. პანკისის ხეობაში მესამე ჰესს კომპანია „ალაზანი ენერჯი“ აშენებს. „ხადორი 3“-ის მშენებლობის დასრულება 2019 წლის დეკემბრამდეა დაგეგმილი.