თბილისი, 20 აპრილი — Sputnik. 2019 წლის პირველ სამ თვეში სხვადასხვა ქვეყნებიდან დეპორტირებული საქართველოს მოქალაქეების რაოდენობამ 955 შეადგინა. მონაცემები შსს-ს ვებგვერდზე გამოქვეყნდა.
ყველაზე ხშირად საქართველოს მოქალაქეებს აძევებენ თურქეთიდან (265), ისრაელიდან (241) და გერმანიიდან (129).
| ქვეყნები | იანვარი | თებერვალი | მარტი |
| თურქეთი | 107 | 91 | 67 |
| ისრაელი | 82 | 81 | 78 |
| გერმანია | 65 | 19 | 45 |
წლის დასაწყისიდან საქართველოს მოქალაქეებმა ქვეყნიდან 776,9 ათასი ვიზიტი განახორციელეს.
შსს-მ ასევე გამოაქვეყნა მონაცემები, რომელიც აჩვენებს, რამდენჯერ ეთქვა უარი საქართველოს მოქალაქეებს სხვადასხვა ქვეყნებში შესვლაზე. ამ კუთხით ისრაელი ლიდერობს - სამ თვეში ქვეყანაში შესვლაზე საქართველოს 400 მოქალაქეს ეთქვა უარი.
სპეცოპერაცია ბარსელონაში - ქართველი არალეგალები მოსალოდნელ შედეგებზე გააფრთხილეს? >>
შემდეგ მოდის კვიპროსი, რომელმაც არასასურველ სტუმრად საქართველოს 109 მოქალაქე მიიჩნია და იტალია (103).
კონკრეტულად თუ რა გახდა საქართველოს მოქალაქეების ამა თუ იმ ქვეყანაში დეპორტაციის ან შესვლაზე უარის მიზეზი, შსს არ აზუსტებს. თუმცა ფაქტია, რომ საქართველოს ხელისუფლებამ არაერთხელ მოუწოდა საკუთარ მოქალაქეებს, ბოროტად არ გამოიყენონ სხვა ქვეყნებთან დაწესებული უვიზო რეჟიმი და არ დაარღვიონ კანონი, რათა უვიზო რეჟიმს საფრთხე არ შეექმნას.
ამ დროისათვის ისრაელმა და კიდევ ევროპის 12-მა ქვეყანამ საქართველო უსაფრთხო ქვეყნების სიაში შეიტანა, ასე რომ საქართველოს მოქალაქეებისთვის ამ ქვეყნებში თავშესაფრის მიღების შანსი თითქმის არ არსებობს.
საქართველოს ხელისუფლებამ არალეგალური მიგრაციის აღკვეთის მიზნით გარკვეული ზომები უკვე მიიღო. უვიზო რეჟიმის მოთხოვნების დამრღვევების მიმართ კანონმდებლობა გაამკაცრა. ამიერიდან ადამიანის რეადმისიასთან დაკავშირებული ყველა ხარჯი თვითონ მას ეკისრება. ასევე გამკაცრდა გვარის გამოცვლის პროცედურები, რაც ხშირად სწორედ ამ პროცესთან იყო დაკავშირებული.
გარდა ამისა, პარლამენტი მუშაობს იმაზე, რომ სხვა ქვეყანაში საქართველოს მოქალაქეების უკანონო ყოფნის ხელშეწყობა ფინანსური ან მატერიალური სარგებლის მიღების მიზნით სისხლის სამართლის წესით დასჯადი ქმედება გახდეს.