ისრაელის გამოქვაბულების შემსწავლელი ცენტრის მეცნიერებმა ზეზუსტი გამოთვლები ჩაატარეს, რის მიხედვითაც, „მალჰამი“ მსოფლიოს ყველაზე დიდი გამოქვაბულია. იხილეთ „Sputnik-საქართველოს“ ფოტომასალაში უჩვეულო "მიწისქვეშა სასახლის" სურათები.
მეცნიერებმა მსოფლიოს ყველაზე გრძელი მარილის გამოქვაბული აღმოაჩინეს სოდომის მთიან მასივში, მკვდარი ზღვის სამხრეთ სანაპიროზე. აღმოჩენა გააკეთეს საერთაშორისო ექსპედიციის მონაწილეებმა. კვლევაში ჩართული იყო 80 სპეციალისტი ცხრა ქვეყნიდან. სპელეოლოგები დღე-ღამეში 10 საათის განმავლობაში მიწის ქვეშ მარილის ლოლუებთან იმყოფებოდნენ, რათა აუცილებელი გამოთვლები ჩაეტარებინათ.
ბიბლიური ლეგენდის თანახმად, სოდომის მთა იმავე ადგილზეა, სადაც ლოტის ცოლი მარილის სვეტად იქცა, როდესაც მის მიერ დატოვებულ ქალაქ სოდომს გახედა. მთა ისრაელის ერთ-ერთი მთავარი ღირსშესანიშნაობაა. ის თითქმის მთლიანად მარილისგან შედგება, მის ქვეშ კი „მალჰამის“ გამოქვაბული მდებარეობს. მეცნიერთა აზრით, გამოქვაბული წყლის ნაკადების მიერ მარილიანი ქანების გამორეცხვის შედეგად წარმოიქმნა. ძლიერი წვიმების დროს ეს პროცესი დღესაც გრძელდება.