თბილისი, 28 მარტი - Sputnik. ოზურგეთში ავტოსაგზაო შემთხვევას 43 წლის მამაკაცი ემსხვერპლა, იუწყება საზოგადოებრივი მაუწყებლის პირველი არხი.
ავტოსაგზაო შემთხვევა ოზურგეთი-შემოქმედის გზის წითელმთის მონაკვეთზე ცოტა ხნის წინ მოხდა. მსუბუქი ავტომანქანა გზის სავალი ნაწილიდან გადავიდა და რკინის ჭიშკარს შეეჯახა.
ავტომანქანის მძღოლი ადგილზე გარდაიცვალა. მამაკაცი ოზურგეთის სამაშველო სამსახურის თანამშრომელი იყო.
ფაქტზე გამოძიება საქართველოს სსკ-ის 276-ე მუხლის მეხუთე ნაწილით მიმდინარეობს, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა.