თბილისი, 28 თებერვალი — Sputnik. დიდი ბრიტანეთის ელჩმა საქართველოში ჯასტინ მაკკენზი სმიტმა, რომელიც ქართულ ენას სწავლობს, Twitter-ზე განათავსა საინტერესო ფოტო და ზედ წააწერა „ქართული ზმნები მართლაც ყველაფრის მთქმელია".
ფოტოზე წერია ქართული ზმნა „შემომეხარჯა" და მისი განმარტება – „შემთხვევით ყველაფერი დავხარჯე, მაგრამ ეს არ მინდოდა და ახლა ველოდები, რომ ამ ფაქტს გაგებით მოეკიდებით".
ბრიტანელი ელჩის პოსტი ძალზე პოპულარული გახდა, ის გაიზიარა დაახლოებით 300-მა ადამიანმა და დაახლოებით ათასმა – მოიწონა.
კომენტარებში ხელმომწერები მაკკენზის ხუმრობითა და სერიოზულად მსგავს ზმნებს აწვდიან: „შემომეჭამა", „შემომეBREXITა" და სხვ.
ჯასტინ მაკკენზი სმიტი საქართველოში დიდი ბრიტანეთის ელჩი 2016 წლის აგვისტოდან არის, თუმცა ქართული ენის სწავლა მან 2015 წლიდან დაიწყო. დიპლომატმა საკმაოდ კარგად იცის ქართული და ამ ენაზე საჯარო განცხადებებითაც გამოდის.