თბილისი, 15 თებერვალი – Sputnik. სინოპტიკოსები საქართველოს ტერიტორიაზე უახლოეს დღეებში ამინდის გაუარესებას პროგნოზირებენ – ქვეყნის უმეტეს რაიონებში მოსალოდნელია ნალექი და ძლიერი ქარი.
შავი ზღვის სანაპიროზე შტორმი 3–4 ბალს მიაღწევს.
„მოსალოდნელმა ძლიერმა ნალექებმა შესაძლებელია მთიან ზონებში თოვლის ზვავების ფორმირება და მეწყრული პროცესების ჩასახვა-გააქტიურება გამოიწვიოს“, – ნათქვამია გარემოს ეროვნული სააგენტოს Facebook–გვერდზე.
სინოპტიკოსების პროგნოზით, 16–19 თებერვალს მთაში და მაღალ მთაში მოთოვს, მოსალოდნელია ნისლი და ქარბუქი. ჰაერის ტემპერატურა დასავლეთ და აღმოსავლეთ საქართველოს დაბლობში +5–10 გრადუსია მოსალოდნელი.
ქარის სიჩქარე 10–15 მეტრი წამში იქნება, მაგრამ დროგამოშვებით 20–25 მეტრამდე შეიძლება გაძლიერდეს.