თბილისი, 13 იანვარი — Sputnik. შინაგან საქმეთა სამინისტროს თანამშრომლებმა თბილისში არასრულწლოვანების მიმართ იძულების და პირადი ცხოვრების შესახებ ინფორმაციის ხელყოფის ბრალდებით 31 წლის მამაკაცი დააკავეს, ნათქვამია უწყების მიერ გავრცელებულ განცხადებაში.
სამართალდამცველებმა გამოძიება ერთ-ერთი არასრულწლოვანი გოგონას მშობლის შეტყობინების საფუძველზე დაიწყეს.
საქმის მასალებიდან ირკვევა, რომ ბრალდებული სოციალური ქსელით FACEBOOK-ის გამოყენებით სისტემატიურად აიძულებდა არასრულწლოვნებს მასთან ინტიმური ხასიათის მიმოწერა ჰქონოდათ. წინააღმდეგ შემთხვევაში კი პირადი ცხოვრების ამსახველი ინფორმაციისა და პერსონალური მონაცემების გასაჯაროებით ემუქრებოდა.
„საბედნიეროდ შსს-მ დააკავა დამნაშევე პირი. როგორც ჩანს ეს პირველი შემთხვევა არ იყო. ვთვლი, რომ ყველამ, ვინც მსგავს სიტუაციაში აღმოჩნდება, უნდა ამხილოს ეს ავადმყოფები“, - განუცხადა „Sputnik-საქართველოს“ ერთ-ერთი არასრულწლოვნის მშობელმა.
გამოძიება სსკ-ის 150-ე და 157-ე მუხლებით მიმდინარეობს, რაც იძულებას და პირადი ცხოვრების შესახებ ინფორმაციის ხელყოფას გულისხმობს.