თბილისი, 8 იანვარი — Sputnik. ავიაკომპანია Turkish Airlines 2019 წლის იანვრიდან თბილისიდან ანკარის მიმართულებით პირდაპირ რეისებს განახორციელებს, ნათქვამია საქართველოს სამოქალაქო ავიაციის სააგენტოს ოფიციალურ Facebook-გვერდზე.
18 იანვრიდან საქართველოსა და თურქეთის დედაქალაქებს შორის რეგულარული ფრენები კვირაში ორჯერ – ორშაბათს და პარასკევს განხორციელდება. ქალაქებს ერთმანეთთან Boeing 737–800 მარკის თვითმფრინავები დააკავშირებს.
სააგენტოს ცნობით, თურქული ავიაკომპანია ანკარა-თბილისი-ანკარას მიმართულებით რეგულარულ ფრენებს 18 იანვრიდან ზამთრის სანავიგაციო სეზონის ბოლომდე (29 მარტამდე) შეასრულებს.
აღსანიშნავია, რომ ანკარა-თბილისი-ანკარა ახალ მიმართულებას წარმოადგენს და აღნიშნულ საჰაერო ხაზზე რეგულარული საჰაერო მიმოსვლა აქამდე არ განხორციელებულა.