თბილისი, 5 იანვარი – Sputnik. ყველაზე ხშირად საქართველოში 2018 წელს აზერბაიჯანის, რუსეთისა და სომხეთის მოქალაქეები ჩამოდიოდნენ, ტურიზმის ეროვნული ადმინისტრაციის ვებგვერდზე გამოქვეყნებული მონაცემების თანახმად.
საქართველოს ეკონომიკის მინისტრმა ტურიზმის სფეროს ძირითადი გამოწვევა დაასახელა >>
გასულ წელს საქართველოს უცხოელთა რეკორდული რაოდენობა ესტუმრა. საერთაშორისო ვიზიტორებმა ქვეყნის საზღვარი 8,7 მილიონჯერ გადაკვეთეს, აქედან 4,8 მილიონჯერ - ტურიზმის მიზნით.
პირველ ადგილზე არინ აზერბაიჯანის მოქალაქეები. მეორეზე - რუსეთის და მესამეზე - სომხეთის მოქალაქეები. ამასთან, რუსეთისა და აზერბაიჯანის მოქალაქეებში საქართველოს პოპულარობა იზრდება.
საქართველოში მეზობლების ვიზიტები
ქვეყანა | 2017 წელი | 2018 წელი | ცვლილება |
| აზერბაიჯანი | 1 301 556 | 1 424 610 | +9,5% |
| რუსეთი | 1 315 057 | 1 404 757 | +23,8% |
| სომხეთი | 1 287 168 | 1 268 886 | -1,4% |
საქართველო აგრეთვე პოპულარულია თურქეთის, ირანის, უკრაინის, ისრაელისა და პოლონეთის მოქალაქეებს შორის.
უცხოელთა უმრავლესობა საქართველოში თბილისის საერთაშორისო აეროპორტის, „სარფის“ და „ყაზბეგის“ საკონტროლო-გამშვები პუნქტიდან შემოდის.
თბილისის საერთაშორისო აეროპორტზე მოდის ყველა ვიზიტის 19,5%, „სარფზე“ – 18%, ხოლო „ყაზბეგზე“ – 15,7%.
საქართველოს ხელისუფლებაში აღნიშნავენ, რომ ტურიზმში რეკორდული მაჩვენებლების მიუხედავად, მიღწეულზე შეჩერებას არ აპირებენ.
პირველ რიგში, ტურისტებისათვის უფრო მეტი კომფორტის შესაქმნელად გაგრძელდება გზების მოწესრიგება, განსაკუთრებით კულტურის ძეგლებისა თუ ღირსშესანიშნაობებისკენ მიმავალის.
გარდა ამისა, სახელმწიფო სამედიცინო, სპორტული, ღვინის და ა.შ. ტურიზმის განვითარებასაც აპირებს.
სამედიცინო ტურიზმი საქართველოში – სტომატოლოგიიდან პლასტიკურ ქირურგიამდე >>
ხელისუფლება ისეთი ღონისძიებების გატარებას გეგმავს, რომ ქვეყანა ოთხივე სეზონზე მიმზიდველი იყოს. ჯერჯერობით ტურისტების უმრავლესობა საქართველოში გაზაფხულის ბოლოდან შემოდგომის დასაწყისამდე ან ზამთარში ჩამოდის.