თბილისი, 16 დეკემბერი - Sputnik. საქართველოს პირველი ქალი პრეზიდენტი აპირებს გამგზავრებას ავღანეთში ქართველ სამხედროებთან, რომლებიც მსახურობენ ნატოს სამშვიდობო მისიაში „მტკიცე მხარდაჭერა“, განაცხადა მან ხალხისადმი თავის პირველ მიმართვაში.
„მე ჩავალ ავღანეთში ჩვენი ქვეყნის ჯარისკაცებთან, რომლებიც ღირსეულად და ზოგჯერ სიცოცხლის ფასად იბრძვიან ჩვენი პარტნიორების გვერდით. ისინი ებრძვიან გლობალურ საფრთხეებს, რომელიც ემუქრება მშვიდობას მსოფლიოში, რეგიონში და ჩვენს ქვეყანაში“, – განაცხადა სალომე ზურაბიშვილმა.
როგორც ქვეყნის მთავარსარდალმა მან საქართველოს შეიარაღებულ ძალებს სრული ნდობა გამოუცხადა.
ამასთან ზურაბიშვილმა განაცხადა, რომ დაუშვებელია ჯარის პოლიტიკური ნიშნით დაყოფა.
„მშვიდობიანი და სტაბილური კავკასია სჭირდება არა მხოლოდ რეგიონს, არამედ მთელ მსოფლიოს. საქართველომ უნდა გააძლიეროს თავისი პოზიცია კავკასიაში. ჩვენ შეგვიძლია ამ რეგიონში ჩვენი ისტორიული როლის დაბრუნება და ამ პასუხისმგებლობის აღება“, - განაცხადა მან.
„მტკიცე მხარდაჭერა" (Resolute Support) ნატოს არასაომარი მისიაა, რომელიც ავღანეთში 2015 წლის 1 იანვრიდან ამოქმედდა. ნატოსა და ავღანეთის ორმხრივი შეთანხმების თანახმად, ქვეყანაში 13000 სამხედრო იმყოფება, რომელთა ფუნქციებში ავღანური ძალოვანი სტრუქტურების სწავლება და კონსულტაცია შედის.
ამჟამად ნატოს მისიაში 872 ქართველი სამხედრო მონაწილეობს. ისინი დისლოცირებული არიან ბაგრამის, ქაბულისა და მაზარ-ი-შარიფის ბაზებზე.