თბილისი, 2 დეკემბერი - Sputnik. სომხეთის პრეზიდენტ არმენ სარქისიანსა და საქართველოს არჩეულ პრეზიდენტ სალომე ზურაბიშვილს შორის სატელეფონო საუბარი შედგა, იუწყება „Sputnik-სომხეთი“ რესპუბლიკის მეთაურის პრესსამსახურზე დაყრდნობით.
დამოუკიდებელმა კანდიდატმა სალომე ზურაბიშვილმა, რომელსაც მხარს მმართველი პარტია „ქართული ოცნება - დემოკრატიული საქართველო“ უჭერდა, 28 ნოემბერს საპრეზიდენტო არჩევნების მეორე ტურში გაიმარჯვა. მას ამომრჩეველთა 59,52%-მა მისცა ხმა, ხოლო ოპოზიციური გაერთიანება „ძალა ერთობაშიას“ კანდიდატ გრიგოლ ვაშაძეს - 40,48%.
სატელეფონო საუბარში სარქისიანმა გამოხატა რწმენა იმისა, რომ სომხეთსა და საქართველოს შორის მეგობრობის ურთიერთობები წარმატებით განვითარდება.
მანამდე სომხეთის პრეზიდენტმა ზურაბიშვილს მისალოცი წერილი გამოუგზავნა.
„დარწმუნებული ვარ, ჩვენი ერთობლივი ძალისხმევით, სომხურ-ქართული მეგობრული და თბილი ურთიერთობები სამომავლოდაც გაგრძელდება და ყველა მიმართულებით განვითარდება. ორ ერს შორის ურთიერთობების ახალ ხარისხობრივ დონეზე ასაყვანად, პოზიტიური დინამიკა აღინიშნება“, – აღნიშნულია მისალოც შეტყობინებაში.
მას გამარჯვება უკვე მიულოცეს სომხეთის პრემიერ-მინისტრის მოვალეობის შემსრულებელმა ნიკოლ ფაშინიანმა, აზერბაიჯანის, ლიეტუვას, უკრაინის, საფრანგეთის და ბელარუსის პრეზიდენტებმა.