თბილისი, 21 ოქტომბერი - Sputnik. მაღალმთიანი აჭარა 100 წლამდე ასაკის უკვე 36 ადამიანს ითვლის - ყველა მათგანი ქალია, იუწყება რეგიონული ტელეარხი TV25.
ერთ-ერთ მათგანს, ფატი მანელიშვილს ოთხშაბათს 100 წელი შეუსრულდა. მანელიშვილი ქობულეთის მუნიციპალიტეტის სოფელ ლეღვაში ცხოვრობს. ის 70 წლის განმავლობაში პედაგოგიური საქმიანობით იყო დაკავებული.
მუდამ ახალგაზრდები: როგორ ცეკვავენ საქართველოში 90 წლის ასაკში >>
„ყველა ჩემი მოსწავლე მიყვარდა. ჩემი ამოცანა იყო სწორად აღმეზარდა მოსწავლეები და სწორ გზაზე დამეყენებინა“, - იხსენებს მანელიშვილი.
100 წლის ხანდაზმულს იუბილე მიულოცა აჭარის ჯანდაცვისა და სოციალური დაცვის მინისტრმა ზაალ მიქელაძემ, რომელმაც მას საჩუქრად 1000 ლარი გადასცა.
აჭარის მოსახლეობა 2018 წლის დასაწყისისთვის 346,3 ათას ადამიანს შეადგენს. წელს 100 წელი 9 აჭარელს შეუსრულდა.
საქართველოში 2018 წლის დასაწყისისთვის 85 წელს ზემოდ ასაკის 44,3 ათასი ადამიანი ცხოვრობდა, მათგან მხოლოდ 12,9 ათასი - მამაკაცებია.
რაც შეეხება 100 წელს ზემოდ ადამიანებს, ბოლო მონაცემები 2014 წლის მოსახლეობის აღწერის შედეგებით არის წარმოდგენილი. მაშინ საქართველოში ცხოვრობდა 287 ადამიანი, რომელმაც ერთ საუკუნეს გადააბიჯა და მათგან მხოლოდ 14 მამაკაცი იყო.