თბილისი, 24 სექტემბერი - Sputnik. შინაგან საქმეთა სამინისტროს თანამშრომლებმა ქალაქ ნინოწმინდაში ყაჩაღობის ბრალდებით 24 წლის მამაკაცი დააკავეს, ნათქვამია უწყების მიერ გავრცელებულ განცხადებაში.
საქმის მასალებიდან ირკვევა, რომ 22 სექტემბერს ნიღბიანმა დამნაშავემ თავისუფლების ქუჩაზე მდებარე სლოტ-კლუბი „ვულკანის“ ოპერატორს ცეცხლსასროლი იარაღის მუქარით ფული გამოსტაცა.
პოლიციამ ბრალდებული ცხელ კვალზე დააკავა. მისი პირადი ჩხრეკისას გატაცებული თანხა, მისი საცხოვრებელი სახლის ჩხრეკისას კი დანაშაულის ჩადენის იარაღი – ТТ სისტემის პისტოლეტი ნივთმტკიცებად ამოიღეს.
დაკავებული ჩადენილ დანაშაულს აღიარებს.
გამოძიება დაწყებულია სსკ-ის 179-ე მუხლით („ყაჩაღობა“), რაც ხუთიდან შვიდ წლამდე ვადით თავისუფლების აღკვეთას ითვალისწინებს.