თბილისი, 10 სექტემბერი — Sputnik. ზაქარია ფალიაშვილის სახელობის თბილისის ოპერისა და ბალეტის თეატრში სამი დღის განმავლობაში ნამდვილი ანშლაგი იყო - საქართველოში აბაის სახელობის ყაზახეთის ოპერისა და ბალეტის სახელმწიფო აკადემიური თეატრის გასტროლები გაიმართა.
თეატრმა, საოპერო და საბალეტო ხელოვნების კაშკაშა წარმომადგენლების შესრულებით, ქართველ მსმენელს ყაზახეთის კლასიკური ხელოვნება გააცნო. დასის შემადგენლობაში არიან ყაზახეთის დამსახურებული მოღვაწეები, პრესტიჟული საერთაშორისო კონკურსების ლაურეატები, რომელთაც სახალხო აღიარება მოიპოვეს როგორც მშობლიურ ქვეყანაში, ისე მის ფარგლებს გარეთ.
სამდღიანი გასტროლების ფარგლებში ყაზახმა მუსიკოსებმა ქართულ სცენაზე წარმოადგინეს ოპერა „აბაი", რომელიც თეატრის სავიზიტო ბარათს წარმოადგენს და ის ყაზახეთში საოპერო ჟანრის ძირითადი ნაწარმოებია; საბალეტო დადგმა „ბახჩისარაის შადრევანი" და გასტროლების დასასრულ - სიმფონიური გალა-კონცერტი, რომელზეც აჟღერდა ყაზახი, ქართველი და დასავლეთევროპელი კომპოზიტორების ნაწარმოებები თეატრის წამყვანი სოლისტების შესრულებით.
გასტროლები ჩატარდა ყაზახეთის კულტურისა და სპორტის სამინისტროს, ასევე საქართველოში ყაზახეთის საელჩოს მხარდაჭერით.