თბილისი, 4 აგვისტო — Sputnik. მრავალეროვნული სწავლება „ღირსეული პარტნიორი 2018“-ის ფარგლებში ვაზიანის სასროლეთზე სხვადასხვა სამხედრო ვარჯიში მიმდინარეობს, ნათქვამია საქართველოს თავდაცვის სამინისტროს ვებგვერდზე გავრცელებულ განცხადებაში.
ამ ეტაპზე ქვედანაყოფები საცეცხლე მომზადებას სხვადასხვა ტიპის შეიარაღებით გადიან.
„საერთაშორისო წვრთნაში ჩართული საქართველოს შეიარაღებული ძალების I ქვეითი ბრიგადის მე-12 ბატალიონი ავტომატური ცეცხლსასროლი იარაღებიდან სხვადასხვა მანძილზე სროლის სავარჯიშოებს ასრულებს. საბრძოლო ჯავშანმანქანა „სტრაიკერების“ დახმარებით საცეცხლე მომზადებას გადიან აშშ-ის II საკავალერიო პოლკის სამხედრო მოსამსახურეებიც“, — ნათქვამია განცხადებაში.
გავრცელებული ინფორმაციით, უკრაინის შეიარაღებული ძალების წარმომადგენლები ქართველ სამხედროებთან ერთად ტაქტიკურ ამოცანებს ასრულებენ და საკუთარ გამოცდილებას ერთმანეთს უზიარებენ.
სამხედრო სწავლება საქართველოს შეიარაღებული ძალებისა და აშშ-ის ევროპული სარდლობის ლიდერობით ორი კვირის განმავლობაში გაგრძელდება.
სწავლება წინა წლებთან შედარებით ფართომასშტაბიანია — გაზრდილია მასში მონაწილე ქვეყნებისა და სამხედრო მოსამსახურეების რაოდენობა, გაზრდილია ასევე სწავლებაში ჩართული გერმანული ჯავშანტექნიკისა და ამერიკული ავიაციის რაოდენობაც.
მრავალეროვნული სამხედრო სწავლება „ღირსეული პარტნიორი 2018"-ის მიზანია საქართველოს, აშშ-ის და პარტნიორ ქვეყნებს შორის მზადყოფნის და თავსებადობის ამაღლება. ასევე, სტაბილურობის, თავდაცვითი და შეტევით ოპერაციებში უნარ-ჩვევების გაუმჯობესება და შავი ზღვის აუზში უსაფრთხოების გარემოს შექმნაში წვლილის შეტანა.
წვრთნები „ღირსეული პარტნიორი" 15 აგვისტოს დასრულდება.