თბილისი, 8 ივნისი — Sputnik. ბათუმის საერთაშორისო აეროპორტი 2018 წლის დასაწყისიდან 109,5 ათასზე მეტ ადამიანს მოემსახურა, რაც 51%–ით მეტია გასული წლის იანვარ–მაისის პერიოდთან შედარებით, ნათქვამია „გაერთიანებული აეროპორტები საქართველოს“ განცხადებაში.
ბათუმის აეროპორტი, რომლითაც მგზავრების საერთო რაოდენობის 6,8%–ზე მეტმა ისარგებლა, შიდა და საერთაშორისო რეისების გარდა, თურქეთის ჩრდილო-აღმოსავლეთ რეგიონებში შიდა ავიამიმოსვლას ემსახურება.
საქართველოს აეროპორტებმა 2017 წელს 4 მილიონზე მეტ მგზავრს გაუწიეს მომსახურება>>>
მთლიანობაში, მგზავრთნაკადის ზრდის მაღალი მაჩვენებელი დაფიქსირდა ქვეყნის სამივე საერთაშორისო აეროპორტში, ნათქვამია განცხადებაში. 2018 წლის იანვარ–მაისში მათ რეგულარული და არარეგულარული რეისებით 1,6 მილიონზე მეტ ადამიანს გაუწიეს მომსახურება – 32%–ით მეტ მგზავრს 2017 წლის ანალოგიურ პერიოდთან შედარებით.
ყველაზე მეტი მგზავრი თბილისის შოთა რუსთაველის სახელობის საერთაშორისო აეროპორტმა გაატარა – მიმდინარე წლის ხუთ თვეში ის დაახლოებით 1,3 მილიონ ადამიანს მოემსახურა, რაც 32%-ით მეტია 2017 წლის ანალოგიურ პერიოდთან შედარებით. თბილისის აეროპორტზე მგზავრების საერთო რაოდენობის 82,6% მოდის.
ქუთაისის დავით აღმაშენებლის საერთაშორისო აეროპორტი 2018 წლის იანვარ–მაისში დაახლოებით 171,1 ათას ადამიანს – 20%–ით მეტს მოემსახურა გასული წლის ანალოგიურ პერიოდთან შედარებით.
ქუთაისის აეროპორტის პრიორიტეტი საქართველოს ავიაბაზარზე დაბალბიუჯეტიანი ავიაკომპანიების მოზიდვა და კონკურენტული გარემოს შქმნაა. ქუთაისის აეროპორტზე მგზავრების საერთო რაოდენობის 10,6% მოდის.
მესტიისა და ამბროლაურის აეროპორტებით, რომლებიც ადგილობრივი ავიამიმოსვლისთვის გამოიყენება, 2,15 ათასმა მგზავრმა ისარგებლა.