ალჟირული წარმოშობის ფრანგი ფეხბურთელი ზინედინ ზიდანი მსოფლიო ფეხბურთის ისტორიაში ერთ-ერთ საუკეთესო მოთამაშედ მიიჩნევა. იხილეთ ფოტოკადრები, სადაც აღბეჭდილია მომენტები, თუ როგორ ვითარდებოდა ზიდანის კარიერა.
ზიდანმა კარიერა დაიწყო საფეხბურთო კლუბ "კანში", მოგვიანებით კი "ბორდოს" რიგებს შეუერთდა. თუმცა მსოფლიოსათვის ცნობილი ის "იუვენტუსისა" და მადრიდის „რეალის" შემადგენლობაში თამაშით გახდა. სწორედ ამ გუნდებში მოიპოვა მან თორმეტი ჯილდო.
ზიდანი სამჯერ აღიარეს მსოფლიოს საუკეთესო ფეხბურთელად (1998, 2000, 2003) და ევროპის საუკეთესო ფეხბურთელად (1998). 2004 წელს ის უეფამ ბოლო 50 წლის საუკეთესო ფეხბურთელად დაასახელა. 2016 წელს კი ზიდანი France Football-ის ვერსიით საფრანგეთის ისტორიაში საუკეთესო ფეხბურთელის ტიტულის მფლობელი გახდა. "რეალმა" ის 2001 წელს 75 მილიონ ევროდ იყიდა, რაც იმ მომენტისთვის რეკორდული მაჩვენებელი იყო.
1994 წლიდან 2006 წლის ჩათვლით ზიდანი საფრანგეთის ეროვნული ნაკრების წევრი იყო, რომლის შემადგენლობაშიც ის გახდა მსოფლიო ჩემპიონი (1998) და ევროპის ჩემპიონი (2000). მსოფლიო ჩემპიონატზე 2006 წელს ის ნაკრების კაპიტანი იყო და ტურნირის საუკეთესო ფეხბურთელიც გახდა.
კარიერის დასრულების შემდეგ ზიდანი ბოლო დრომდე "რეალის" რიგებში განაგრძობდა მოღვაწეობას, სადაც იყო პრეზიდენტის მრჩეველი, სპორტული დირექტორი, მეორე გუნდის მწვრთნელი და მთავარი მწვრთნელის ასისტენტი. 2016 წლის იანვრიდან 2018 წლის 31 მაისის ჩათვლით ის მადრიდის „რეალის" მთავარი მწვრთნელი იყო.
2017 წლის ოქტომბერში The Best FIFA Football Awards-ის დაჯილდოების ცერემონიაზე ზიდანი მსოფლიოს საუკეთესო მწვრთნელად აღიარეს — "რეალმა" ზედიზედ ორჯერ გაიმარჯვა ჩემპიონთა ლიგაზე, რაც მანამდე ვერავინ შეძლო.