თბილისი, 23 მაისი — Sputnik. ქართულმა მოკლემეტრაჟიანმა ანიმაციურმა ფილმმა „ჯინო" (Gino) გერმანიაში ველოკულტურის საერთაშორისო კინოფესტივალზე ICFF (International Cycling Film Festival) გრან-პრი მიიღო, აღნიშნავს რეჟისორი დათო კიკნაველიძე თავის Facebook-გვერდზე.
„ჯინო" პირველი ქართული ანიმაციაა 3D ფორმატში, რომელიც გადაღებულია საქართველოს ეროვნული კინოცენტრის მხარდაჭერით.
„ჯინოს" სიუჟეტის ცენტრში გომბეშო ჯინოსა და მისი მეგობრების თავგადასავალია, რომლებიც ლამაზი ტბის ნაპირას ცხოვრობენ. ერთხელაც ცხოველები დილემის წინაშე აღმოჩნდებიან — მათ მიწაზე ადამიანები მშენებლობას იწყებენ, რის გამოც ცხოველები იძულებული ხდებიან დაივიწყონ განსხვავებული შეხედულებები და ერთად იბრძოლონ საერთო საქმისთვის — სახლის გადასარჩენად.
რეჟისორმა დავით კიკნაველიძემ 30-წუთიანი მულტფილმი „ჯინო" ანიმაციურ სტუდია Lira Production-ში, ქართული კინოცენტრის მხარდაჭერით შექმნა.
The International Cycling Film Festival — საერთაშორისო კინოფესტივალია ველოკულტურის შესახებ, რომელიც გერმანიაში, პოლონეთსა და ნიდერლანდებში ყოველ წელს იმართება. ICFF მოიცავს ანიმაციურ, დოკუმენტურ და სათამაშო კინოს.