თბილისი, 14 მაისი — Sputnik. ქართული ნაციონალისტური ორგანიზაციების „ქართული მარში“ და „ქართული იდეა“ რამდენიმე ასეული მომხრე რუსთაველის გამზირზე შეიკრიბა და აპროტესტებს „კლუბურ აქციას“, რომელიც დედაქალაქში გასულ უქმეებზე გაიმართა.
უქმეებზე რუსთაველის გამზირზე, პარლამენტის შენობის წინ ახალგაზრდული ორგანიზაცია „თეთრი ხმაურის მოძრაობის" ორგანიზებით საპროტესტო აქცია დაიწყო, რომელზეც „კლუბური აქციის" მონაწილეები 12 მაისს თბილისის რამდენიმე ღამის კლუბში შსს-ს სპეციალური დანიშნულების რაზმის მიერ ჩატარებული სპეცოპერაციისას პოლიციელთა ქმედებებს აპროტესტებდნენ და პრემიერ-მინისტრ გიორგი კვირიკაშვილის და შინაგან საქმეთა მინისტრ გიორგი გახარიას გადადგომას მოითხოვდნენ. აქციის ერთ-ერთმა მონაწილე გოგონამ იცეკვა 9 აპრილის მსხვერპლთა მემორიალზე იცეკვა, რამაც მათი იდეოლოგიური მოწინააღმდეგეების უკმაყოფილება გამოიწვია. ისინი მიიჩნევენ, რომ ღამის კლუბებში მყოფი ადამიანები ტრადიციულ ქართულ ფასეულობებს ღალატობენ.
„თითოეული ჩვენგანი შეურაცხყოფილები ვართ იმ შეურაცხყოფით რომელიც მათ მიაყენეს 9 აპრილს დაღუპულთა მემორიალს, როდესაც სტრიპტიზი იცეკვეს იქ და ათასგვარი სისაძაგლე ჩაიდინეს. ჩვენ გვინდა რომ ჩვენი დემონსტრაციით ყველას დავანახოთ რომ საქართველოს მოსახლეობის უმრავლესობა არ იზიარებს იმ პოზიციას რაც ხდებოდა ამ რამდენიმე დღის განმავლობაში რუსთაველის გამზირზე. ახალგაზრდების გამოსვლას ჩვენ არასოდეს არ შევეწინააღმდეგებით მაგრამ აქ არის საქმე თუ რა ძალები გამოდიან. ეს იყვნენ პოლიტიკურად ანგაჟირებული ძალები“, —განაცხადა სანდრო ბრეგაძემ ტელეკომპანია Rustavi2-ის ეთერში.
საპროტესტო აქციის მონაწილეებმა ფილარმონიის შენობიდან პარლამენტისკენ მსვლელობით გაიარეს. მომიტინგეებმა რუსთაველის გამზირზე მოძრაობა ნაწილობრივ გადაკეტეს.
მომიტინგეები აცხადებდნენ, რომ 9 აპრილის მემორიალის კურთხევას, შემდეგ კი ტაძარში სალოცავად წასვლას აპირებენ.