თბილისი, 23 აპრილი — Sputnik. სამართალდამცველებმა ხმაურის დასაშვები დონის გადაჭარბებისთვის 2017 წლის 15 აგვსტოდან დღემდე 252 პირი დააჯარიმეს, იუწყება საზოგადოებრივი მაუწყებლის პირველი არხი.
შინაგან საქმეთა სამინისტროს მონაცემებით, 2017 წლის აგვისტოდან წლის ბოლომდე 177 ფიზიკური და იურიდიული პირი დაჯარიმდა, ხოლო მიმდინარე წლის დასაწყისიდან მარტის ჩათვლით – 75 ჯარიმა დაიწერა.
ადმინისტრაციულ სამართალდარღვევათა კოდექსში ცვლილებების თანახმად, 2017 წლის 15 აგვისტოს ძალაში შევიდა კანონი ხმაურის აკრძალვის შესახებ. კანონი პირველ ჯერზე გაფრთხილებას ითვალისწინებს, განმეორებით შემთხვევებში კი დაწესებულია ფულადი ჯარიმა — 150 ლარი ფიზიკური პირისთვის, და 500 ლარი იურიდიული პირისთვის. ყოველ მომდევნო შემთხვევაში ჯარიმის ოდენობა ორმაგდება.
შეგახსენებთ: აკუსტიკური ხმაურის დასაშვები ნორმები განსხვავებულია დღისა (08:00 სთ-დან 23:00 სთ-მდე) და ღამის (23:00 სთ-დან 08:00 სთ-მდე) პერიოდებისათვის.
ადმინისტრაციულ სამართალდარღვევათა კოდექსში შესული ცვლილებების თანახმად, იურიდიულ თუ ფიზიკურ პირს ადმინისტრაციული პასუხისმგებლობა ეკისრება:
• დღის ან ღამის საათებში საცხოვრებელ სახლში, კერძო საკუთრებაში არსებული უძრავი ქონების ან საზოგადოებრივი/საჯარო დაწესებულების შენობაში აკუსტიკური ხმაურის დასაშვები ნორმების გადამეტებაზე;
• ღამის საათებში პიროტექნიკური ნაკეთობის გამოყენებაზე.
აღსანიშნავია, რომ აკუსტიკური ხმაურის ნორმების დარღვევის ფაქტებზე მოქალაქეებს შეუძლიათ აცნობონ პოლიციას, რომელსაც ევალება კიდეც მოახდინოს რეაგირება დარღვევაზე.
ხმაურის დასაშვებ ნორმად ბინებსა და სახლებში ითვლება არა უმეტეს 35 დეციბელისა დღისით და 30 დეციბელისა ღამით. სავაჭრო ობიექტებში — 55 დეციბელი, სამედიცინო დაწესებულებებში — 40, ხოლო სასწავლო დაწესებულებებში — 35 დეციბელი.
ბარებისა და რესტორნებისთვის შეზღუდვები დაწესებულია იმის გათვალისწინებით, თუ რა მანძილითაა ისინი დაშორებული მეზობლად მდებარე საცხოვრებელი სახლებიდან. დაბალსართულიანი შენობის მახლობლად დღისით დაშვებულია 50 დეციბელამდე ხმაური, ღამით კი — 40 დეციბელი. მაღალსართულიანი სახლების მახლობლად: დღისით — 55 დეციბელი, ღამით — 45.