თბილისის მოდის კვირეულის ახალი სეზონის გახსნაზე ორგანიზატორებმა ძველი თბილისის სტილი და ატმოსფერო შექმნეს. იხილეთ Sputnik-საქართველოს ფოტოლენტაში, თუ როგორ ჩატარდა ღონისძიება
თბილისის მოდის კვირეულის ახალი სეზონი ქართველი მსახიობი მედეა ჯაფარიძისადმი მიძღვნილი პერფორმანსით გაიხსნა. ცერემონია ამჯერად პირველი ქართული დემოკრატიული რესპუბლიკის ბაღის ტერიტორიაზე გაიმართა. ორგანიზატორებმა ცნობილი ქართული კომედია "ქეთო და კოტეს" გარემო შექმნეს, რომელიც 1948 წელს პიესა "ხანუმას" მოტივებზეა გადაღებული.
ცერემონიის სტუმრებს ეგებებოდნენ "ქეთო და კოტეში" ჯაფარიძის გმირივით ჩაცმული გოგონები, ბაღში კინტოები სეირნობდნენ, ისმოდა მუსიკა, მთელი ტერიტორია ლამაზი დეკორაციებითა და ყვავილებით იყო მორთული. მოდის დღესასწაულის სტუმრებს უმასპინძლდებოდნენ სხვადასხვა ნუგბარით.
თბილისის მოდის კვირეულის გახსნის ცერემონიის ცნობილი ქართველი ქალებისათვის მიძღვნა უკვე ტრადიციად იქცა. ქორეოგრაფი ნინო რამიშვილის, მსახიობი სოფიკო ჭიაურელის და მხატვარი ელენე ახვლედიანის შემდეგ გახსნის ცერემონია ორგანიზატორებმა ლეგენდარულ ქართველ მსახიობ მედეა ჯაფარიძეს მიუძღვნეს.