თბილისი, 16 აპრილი – Sputnik. საქართველოს პირველმა ჩოგანმა ნიკოლოზ ბასილაშვილმა АТР–ს განახლებულ რეიტინგში თავისი პოზიცია გაიუმჯობესა და 89–ედან მე–80 ადგილზე გადაინაცვლა.
ეს პროგრესი მარაკეშში (მაროკო) АТР 250–ის სერიიდან ტურნირზე მისმა გამოსვლამ განაპირობა. ბასილაშვილი ¼ ფინალამდე მივიდა, სადაც უკვე პორტუგალიელ ჟოაო სოუზასთან წააგო (2:6, 6:4, 1:6).
ამ შედეგის შემდეგ ბასილაშვილმა 45 სარეიტინგო ქულა და საპრიზო თითქმის 14 ათასი ევრო გამოიმუშავა.
აღსანიშნავია, რომ იანვრის შუა რიცხვებიდან მარტის შუა რიცხვებამდე ბასილაშვილმა ზედიზედ შვიდი მატჩი წააგო. მან დამარცხებების ჯაჭვი АТР-ს „მასტერსის" სერიიდან ტურნირზე ასპარეზობისას გაწყვიტა, როდესაც იტალიელ ტომას ფაბიანოსთან შეხვედრა გამარჯვებით დაასრულა.
მთლიანობაში, სამი თვის განმავლობაში არასტაბილური გამოსვლების გამო ქართველმა სპორტსმენმა АТР-ს რეიტინგში 30-ზე მეტი საფეხურით დაიწია — 57-დან 89-ე ადგილზე გადაინაცვლა.
„ქართველმა ჩოგბურთელმა ზედიზედ შვიდი დამარცხების შემდეგ გამარჯვება მოიპოვა" >>
რაც შეეხება მაროკოს ტურნირს, მისი გამარჯვებული ესპანელი პაბლო ანდუხარი გახდა, რომელმაც ფინალში ბრიტანელ კაილ ედმუნდს სძლია (6:2, 6:2).