თბილისი, 26 მარტი — Sputnik. ჭიათურის მაღაროში ავარიის დროს დაღუპულის ცხედარი ნანგრევებიდან ამოიყვანეს, იუწყება ტელეკომპანია Rustavi2.
დაიღუპა მაღაროელი ზაზა აბრამიშვილი. ის დაახლოებით 45 წლის იყო.
მამაკაცის ცხედარი სამი კილომეტრის სიღრმეზე აღმოჩნდა. საგანგებო სიტუაციების მართვის სააგენტოს ინფორმაციით, ადგილზე ოთხი სამაშველო ბრიგადა მუშაობდა.
პროფკავშირების წარმომადგენლების განცხადებით, მაღარო, სადაც ტრაგიკული შემთხვევა მოხდა, ავარიულ მდგომარეობაში იყო.
შსს-ს ინფორმაციით, გამოძიება მიმდინარეობს სსკ-ის 240-ე მუხლით — უსაფრთხოების წესების დარღვევა სამთო, სამშენებლო ან სხვა სამუშაოების დროს. დანაშაული ისჯება ხუთ წლამდე თავისუფლების შეზღუდვით ან ორიდან ხუთ წლამდე თავისუფლების აღკვეთით.