თბილისი, 25 მარტი — Sputnik. მევენახეობის სასოფლო-სამეურნეო კოოპერატივების ხელშეწყობის სახელმწიფო პროგრამით, კოოპერატივს 100 ტონა ყურძნის პირველადი გადამუშავებისათვის საჭირო აღჭურვილობა გადაეცემა, კოოპერატივმა კი უნდა უზრუნველყოს საწარმოს შენობა-ნაგებობის აშენება, ნათქვამია გარემოს დაცვისა და სოფლის მეურნეობის სამინისტროს Facebook-გვერდზე გამოქვეყნებულ განცხადებაში.
უწყების ცნობით, პროგრამაში მონაწილე კოოპერატივის წევრებს საშუალება მიეცემათ არა მხოლოდ ყურძნის, არამედ უკვე ღვინის რეალიზაციიდან მიიღონ სარგებელი.
სახელმწიფო პროგრამაში ჩასართავად საჭიროა, რომ სასოფლო-სამეურნეო კოოპერატივის წევრთა რაოდენობა შეადგენდეს არანაკლებ 20 მეპაიეს. სასოფლო-სამეურნეო კოოპერატივს ან მის მეპაიეებს საკუთრებაში უნდა გააჩნდეთ სულ მცირე 20 ჰექტარი ვენახი. გაშენებული ვაზის ჯიშების არანაკლებ 95% კი უნდა განეკუთნებოდეს ვაზის ნებადართულ ჯიშებს.
მევენახეობის სასოფლო-სამეურნეო კოოპერატივების ხელშეწყობის სახელმწიფო პროგრამის ფარგლებში, გასულ წელს კახეთის რეგიონში, თელავისა და ყვარლის მუნიციპალიტეტებში ყურძნის გადამამუშავებელი 3 კოოპერაციული საწარმო გაიხსნა.