თბილისი, 25 მარტი — Sputnik. ჯაკომო პუჩინის ოპერა „ტურანდოტის“ განახლებული ვერსიის საპრემიერო ჩვენებები თბილისის ოპერისა და ბალეტის თეატრში 2018 წლის 25, 27, 30 მარტს და 1, 14, 15 აპრილს გაიმართება.
„ტურანდოტი“ (Turandot) — კარლო გოცის პიესის მიხედვით დადგმული სამმოქმედებიანი ოპერაა. ლიბრეტო — ჯუზეპე ადამი და რენატო სიმონი. ამ ოპერიდან კალაფის არია Nessun dorma როგორც შემსრულებლების, ისე მსმენელისთვის ერთ-ერთ ყველაზე პოპულარულ საოპერო ფრაგმენტს წარმოადგენს.
პირველი წარმოდგენა 1926 წლის 25 აპრილს მილანში გაიმართა, „ლა სკალას“ სცენაზე. საქართველოში ოპერის პრემიერა 1929 წლის 18 იანვარს „პრინცესა ტურანდოტის“ სახელწოდებით შედგა.
მარტ-აპრილში თბილისის სცენაზე წარდგებიან ფალიაშვილის სახელობის ოპერისა და ბალეტის სახელმწიფო თეატრის სოლისტები, გუნდი და ორკესტრი.
ოპერაზე მუშაობდნენ: დამდგმელი რეჟისორი ალფონსო სინიორინი, სცენოგრაფი კარლა ტოლომეო, კოსტიუმების მხატვრები ფაუსტო რულიზი და ლეილა ფტეიტა, დამდგმელი დირიჟორი ზაზა აზმაიფარაშვილი.
დადგმის სამხატვრო ხელმძღვანელი — ბადრი მაისურაძე.
პროექტი წარმოადგენს ფალიაშვილის ოპერისა და ბალეტის თეატრისა და ტორე დელ ლაგოში (იტალია) „პუჩინის ფესტივალის“ ერთობლივ პროდუქციას.