თბილისი, 11 მარტი — Sputnik. უკრაინაში, კიროვოგრადის ოლქში კერძო სახლში გაჩენილი ხანძრის შედეგად სამი ბავშვი დაიღუპა, იუწყება РИА Новости უკრაინის საგანგებო მდგომარეობის სახელმწიფო სამსახურის პრესსამსახურზე დაყრდნობით.
უწყების მონაცემებით, სოფელ ვერბლუჟკაში კერძო სახლში ხანძრის შესახებ შეტყობინება შაბათ 14:00 საათზე შევიდა. სახლში გათბობა ღუმელის საშუალებით ხდებოდა. მეხანძრე-მაშველების მისვლის მომენტისთვის ხანძარი უკვე 70 კვადრატული მეტრის ფართობზე იყო გავრცელებული.
„ხანძრის ჩაქრობის დროს აღმოჩენილია 2017, 2015 და 2014 წელს დაბადებული სამი ბავშვის ცხედარი“, — ნათქვამია განცხადებაში.
აღნიშნულია, რომ ბავშვების დედა სახლიდან გავიდა და ისინი მეთვალყურეობის გარეშე დატოვა. ხანძარი ორ საათში ჩააქრეს, სპეციალისტები აალების და ბავშვების გარდაცვალების მიზეზებს არკვევენ.