თბილისი, 7 მარტი — Sputnik. წლის დასაწყისიდან საქართველოს შავი ზღვის სანაპიროზე ზღვის ძუძუმწოვრის დაღუპვის მეცხრე შემთხვევა დაფიქსირდა, განაცხადა გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტის უფროსმა არჩილ გუჩმანიძემ Facebook-გვერდზე.
გუჩმანიძის ინფორმაციით, ბოლო შემთხვევა 6 მარტს დაფიქსირდა, ხოლო წინა — 2 მარტს.
„ზღვის ძუძუმწოვრის გამორიყვის მე-9 შემთხვევა. დაღუპვის მიზეზი სათევზაო ბადეში მოხვედრა", — წერს გუჩმანიძე.
გასულ წელს განმუხურიდან სარფამდე ნაპირზე 98 ძუძუმწოვარი გამოირიყა.
სპეციალისტების აზრით, ზღვის ძუძუმწოვართა დაღუპვის ოთხი ძირითადი მიზეზი არსებობს. პირველი — ბიოლოგიური სიკვდილი, როდესაც ძუძუმწოვრები ბუნებრივი სიკვდილით იღუპებიან. მეორე — ეს არის პათოლოგიები, რომლებიც დაავადებებსა და ინფექციებს უკავშირდება. მესამე — სანავიგაციო ტრავმა, როდესაც ისინი გემებს, კატარღებს ეჯახებიან და კვდებიან და მეოთხე მიზეზი — თევზსაჭერ ბადეებში მოხვედრა.