თბილისი, 26 იანვარი — Sputnik. სიღნაღის მუნიციპალიტეტის სოფელ ქვემო ბოდბეში გუშინ, გვიან ღამით მომხდარ ხანძარს ერთი ადამიანის სიცოცხლე ემსხვერპლა, იუწყება ტელეკომპანია Imedi.
ხანძრის დროს სახლში იმყოფებოდა 80 წლის მოხუცი გოგია გოგიშვილი, რომლის გამოყვანა სახანძრო-სამაშველო ბრიგადამ ვერ შეძლო.
ხანძარი ამ დროისთვის ლიკვიდირებულია. რა გახდა აალების მიზეზი, უცნობია.
როგორც „Sputnik–საქართველოს“ შინაგან საქმეთა სამინისტროში განუცხადეს, გამოძიება დაწყებულია 188-ე მუხლის მეორე ნაწილით, რაც გულისხმობს სხვისი ნივთის დაზიანებას ან განადგურებას გაუფრთხილებლობით, რამაც მნიშვნელოვანი ზიანი გამოიწვია და რომელიც ჩადენილია ცეცხლთან ან მომეტებული საფრთხის წყაროსთან გაუფრთხილებელი მოპყრობით.