თბილისი, 25 დეკემბერი — Sputnik. ახალი წლის ღამეს საზოგადოებრივი ტრანსპორტი მგზავრებს უფასოდ მოემსახურება, განაცხადა თბილისის მერმა კახა კალაძემ ოთხშაბათს გამართულ დედაქალაქის მთავრობის სხდომაზე.
31 დეკემბრის ღამეს დედაქალაქში 75 მარშრუტზე 160 ერთეულამდე ავტობუსი, ძირითადად, 30-წუთიანი ინტერვალით იმოძრავებს. გარდა ამისა, თბილისელებსა და დედაქალაქის სტუმრებს უფასოდ მოემსახურება საბაგირო „რიყე–ნარიყალა“.
„ჩვენ ვფიქრობთ, რომ ასეთი ხელშეწყობა არის ძალიან მნიშვნელოვანი და იგივე მიდგომა და დამოკიდებულება იქნება შობის ღამესაც“, – განაცხადა კახა კალაძემ.
ასეთი გრაფიკით საზოგადოებრივი ტრანსპორტი 04:00 საათამდე იმუშავებს, საბაგირო კი 03:00 საათამდე.
