თბილისი, 22 აგვისტო — Sputnik. თბილისში, პეკინის ქუჩაზე მიმდინარე სარემონტო სამუშაოებიდან გამომდინარე, ყაზბეგის გამზირზე ავტოტრანსპორტის მოძრაობა შეიზღუდება, ნათქვამია თბილისის მერიის ვებგვერდზე.
„პეკინის ქუჩაზე მიმდინარე მასშტაბური სარეაბილიტაციო სამუშაოების გამო, 22 აგვისტოს, 15:00 საათიდან 00:00 საათამდე, ყაზბეგის გამზირიდან პეკინის ქუჩაზე ტრანსპორტის მოძრაობა შეიზღუდება. ყაზბეგის გამზირიდან პეკინის ქუჩაზე მოსახვედრად, როგორც კერძო, ისე საზოგადოებრივი ტრანსპორტი იმოძრავებს გამრეკელისა და შემდეგ მიცკევიჩის, ცინცაძის ან ბახტრიონის ქუჩების გავლით“, — ნათქვამია მერიის განცხადებაში.
აღსანიშნავია, რომ სამომავლოდ ქალაქის ხელისუფლება პეკინის ქუჩაზე ავტოტრანსპორტის ცალმხრივი მოძრაობის დანერგვას გეგმავს.
