თბილისი, 1 თებერვალი — Sputnik. 2 თებერვლიდან სადგურის მოედანი–აეროპორტის №37 მარშრუტზე 10 ახალი ავტობუსი ივლის, იუწყება ტელეკომპანია „იმედი“.
მარშრუტზე აღდგება ღამის რეისებიც. მგზავრობის საფასური სტანდარტული იქნება და 50 თეთრი ეღირება.
ახალი ავტობუსები შეზღუდული შესაძლებლობის მქონე პირებისა და ჩვილ ბავშვთა ეტლებისთვის სრულად არის ადაპტირებული და საამისოდ სპეციალური პანდუსებით არის აღჭურვილი, ხოლო სალონში მათთვის განკუთვნილი სივრცეებია გამოყოფილი. Man-ის მარკის ავტობუსებში კონდიცირების სისტემა მუდმივად 22 გრადუსზეა დაპროგრამებული, რაც ზამთარ-ზაფხულ თანაბარი და კომფორტული ტემპერატურის შენარჩუნებას უზრუნველყოფს.
ავტობუსები აღჭურვილია USB-ს როზეტით, რომლის მეშვეობითაც მგზავრებს შესაძლებლობა ექნებათ უფასოდ დამუხტონ ტელეფონები, სმარტფონები, პლანშეტები და სხვა მობილური მოწყობილობები.
აპრილისთვის თბილისს სულ 143 Man-ის ახალი ავტობუსი ეყოლება. ახალი ავტობუსების შემოსვლის პარალელურად დიდ დიღომში 377 ავტობუსზე გათვლილი, თანამედროვე ტექნოლოგიებით აღჭურვილი ავტობაზა შენდება, რომელიც ექსპლუატაციაში 2017 წლის გაზაფხულზე შევა და ქალაქში მოძრავ ავტობუსებს სრულყოფილ მომსახურებას გაუწევს.
