თბილისი, 16 სექტემბერი — Sputnik. საქართველოში iPhone 7-ის გაყიდვა დაიწყო. გაყიდულია პირველი ხუთი სმარტფონი, განუცხადეს Sputnik-ს მაღაზიაში „iPhone+“.
სანუკვარი iPhone-ს ოფიციალურ გაყიდვამდე შეძენა იმათ შეძლეს, ვინც სმარტფონზე შეკვეთა 13-14 სექტემბერს გააფორმა.
„ჩვენ უკვე გავყიდეთ ხუთი მოდელი, რომლებზეც ქართველ მყიდველებს წინასწარი შეკვეთა ჰქონდათ გაფორმებული. სმარტფონის ფასი 9 ათას 999 ლარი იყო“, — აღნიშნა მაღაზიის მენეჯერმა კახა სეფაშვილმა.
მისი თქმით, სმარტფონების ახალ პარტიას მაღაზია შაბათ დილას მიიღებს, რომლის 80% უკვე გაყიდულია.
„ზეგიდან ფასი თანდათან დასტაბილურდება, გამომდინარე იქიდან, რომ გაყიდვები უკვე დაიწყება აშშ-ში. 17 სექტემბრიდან მოდელის ფასი 7 ათას 777 ლარი იქნება“, — განმარტა მაღაზიის მენეჯერმა.
მანვე დაამატა, რომ 18 სექტემბრიდან სმარტფონზე ფასი დაახლოებით 3-4 ათას ლარამდე დაიწევს, 20 სექტემბრისთვის უკვე 2 ათას 599 ლარი ეღირება, ხოლო 20 სექტემბრის შემდეგ iPhone 7-ის ფასი 2 ათას 199 ლარს შეადგენს.
