თბილისი, 22 აგვისტო — Sputnik. საკრებულოს ოპოზიციონერი დეპუტატები ქალაქის მერის დავით ნარმანიასგან პასუხს ელიან შეკითხვებზე, რომლებიც დედაქალაქში ხეების უკანონო გაჩეხვას უკავშირდება.
„თბილისში, ყაზბეგის გამზირზე ათეულობით ხის გაჩეხვის ფაქტმა კიდევ ერთხელ დაადასტურა, რომ თბილისის მერიაში გვაქვს ბევრი სისტემური ხარვეზი, რაზეც თბილისის მერი და მერიის ხელმძღვანელობა პასუხისმგებლობას არ იღებს. ამიტომ, ჩვენ კოლეგებთან ერთად, საკრებულოში ვიბარებთ ხუთშაბათს თბილისის მერს, რომელსაც, მოქმედი კანონმდებლობის შესაბამისად, მოუწევს პასუხი გასცეს ამ და სხვა შეკითხვებს, რომლებიც მოქალაქეებს აწუხებთ“, — განაცხადა „ერთიანი ნაციონალური მოძრაობის“ წევრმა ირაკლი აბესაძემ ბრიფინგზე.
„ერთიანი ნაციონალური მოძრაობის“ დეპუტატების გარდა ბრიფინგს ესწრებოდნენ „რესპუბლიკელებისა“ და „გაერთიანებული დემოკრატების“ წარმომადგენლები და ასევე დამოუკიდებელი დეპუტატი ალეკო ელისაშვილი.
ბრიფინგზე ხელი მოეწერა განცხადებას, რომლითაც საკრებულოს წევრები დავით ნარმანიას 25 აგვისტოს რიგგარეშე ანგარიშის ჩასაბარებლად საკრებულოში იბარებენ. ერთობლივ განცხადებას ხელი საკრებულოს 13-მა დეპუტატმა მოაწერა. ეს რაოდენობა თბილისის მერს იურიდიულად ავალდებულებს საკრებულოში მისვლას.
