თბილისი, 26 ივნისი – Sputnik. პროგრამის „აწარმოე საქართველოში" ფარგლებში იგეგმება 1.3 ათასი ახალი საწარმოსა და 400 სასტუმროს დაფინანსება და მათში 6 მლრდ ლარის ინვესტირება, განაცხადა ქვეყნის პრემიერ–მინისტრმა ირაკლი ღარიბაშვილმა პარლამენტში.
პრემიერმა აღნიშნა, რომ ინვესტიციები მოიზიდება ქვეყნის განვითარების ათწლიანი გეგმის ფარგლებში, რომლის საბოლოო ვარიანტი სექტემბრის ბოლოს იქნება წარმოდგენილი.
გარდა ამისა, მცირე და საშუალო ბიზნესის მხარდასაჭერად საქართველოში დაინერგება რეგიონული წარმოების ხელშეწყობის მექანიზმი, რაც ბიზნეს–ცენტრების 10 რეგიონში განვითარებას მოიაზრებს.
„აწარმოე საქართველოში“ – საქართველოს ხელისუფლების ერთ-ერთი წარმატებული პროექტია, რომელიც მიზნად ისახავს ქვეყანაში ადგილობრივი წარმოების განვითარებას. სააგენტო აერთიანებს ყველა სახელმწიფო პროგრამას, მიმართულს ბიზნეს-სექტორის ხელშეწყობისა და ქვეყნის ეკონომიკური განვითარებისკენ.
