თბილისი, 28 ნოემბერი - Sputnik. „დღევანდელი არჩევანი არის ძალიან მარტივი - არის ორი პოლიტიკური ძალა, იქითა მხარეს არის პოლიტიკური ძალა, რომლის თვისებები არის აგრესია, სიძულვილი, სიცრუე და მეორე მხარეს არის ძალა, რომელმაც ეს ყველაფერი ჩააბარა წარსულს“, - განუცხადა ხმის მისაცემად საარჩევნო უბანზე მისულმა საქართველოს პარლამენტის თავმჯდომარემ ირაკლი კობახიძემ ჟურნალისტებს.
დღეს საქართველოს მოქალაქეებს არჩევანის გაკეთება ორ კანდიდატს შორის უწევს, მმართველი გუნდის მხარდაჭერილ სალომე ზურაბიშვილს - N 48 და ყოფილი მმართველი პარტია „ერთიანი ნაციონალური მოძრაობის" წევრ გრიგოლ ვაშაძეს - N5 - შორის, რომელიც პრეზიდენტობის კანდიდატად ოპოზიციურმა გაერთიანებამ „ძალა ერთობაშია" დაასახელა.
საქართველოს პარლამენტის თავმჯდომარემ თავისი მოქალაქეობრივი ვალი თბილისის N53-ე საარჩევნო უბანზე მოიხადა.
ირაკლი კობახიძემ ამომრჩევლებს აქტიურობისაკენ მოუწოდა და იმედი გამოთქვა, რომ მოქალაქეებს არ გაუჭირდებათ არჩევანის გაკეთება.
„პირველ ტურში დაბალმა აქტივობამ განაპირობა ის, რომ ამ ძალამ („ძალა ერთობაშია“, -რედ.შენ.), ნეგატიურმა ძალამ მიიღო საკმაოდ მაღალი შედეგი. თუ იქნება მაღალი აქტივობა, ამ შემთხვევაში პასუხიც იქნება მაქსიმალურად ადექვატური“, - განაცხადა პარლამენტის თავმჯდომარემ.
მან სთხოვა ყველას, განსაკუთრებით ტელეკომპანია „რუსთავი 2“- ის ჟურნალისტებს, ნუ ქმნიან აგრესიულ ფონს.
„არ არის აგრესიული ფონი ამ არჩევნებში, ნუ შეეცდებით ხელოვნურად შექმნათ ასეთი ფონი, ჩვენ უნდა მივცეთ ამომრჩეველს იმის საშუალება, რომ ხმა მისცენ მშვიდ გარემოში“, - განაცხადა პარლამენტის თავმჯდომარემ.
არჩევნებში მონაწილეობის უფლება აქვს 18 წელს ზემოთ ასაკის 3 მილიონ 528 ათას 658 მოქალაქეს. საქართველოს მოქალაქეებს კენჭისყრაში მონაწილეობა შეუძლიათ როგორც საქართველოში, ისე მის საზღვრებს გარეთ – 39 ქვეყანაში. მთლიანობაში ამ არჩევნებზე 3 ათას 703 საარჩევნო უბანი გაიხსნა.
არჩევნების პროცესს 95 ადგილობრივი და საერთაშორისო მედიის 2,3 ათასამდე ჟურნალისტი აშუქებს.