თბილისი, 18 ოქტომბერი — Sputnik. თბილისელების თითქმის ნახევარს ყოველდღიურად საცობში დგომა უწევს, რაზეც დღეში საშუალოდ 26 წუთი იკარგება, აჩვენა ანალიზისა და კონსულტაციების ჯგუფ ACT-ის მიერ ჩატარებულმა სოციოლოგიურმა კვლევამ.
გამოკითხვამ აჩვენა, რომ საცობებში დგომა რესპონდენტების 44%-ს უწევს, 69%-მა განაცხადა, რომ საცობში დგომა კვირაში ერთხელ მაინც უწევს.
გადაჭედილი გზები თბილისში გამოკითხულთა 84%-ს უკიდურესად აწუხებს.
კვლევამ აჩვენა, რომ თბილისელების 69% ყველაზე ხშირად გადაადგილდება ავტობუსით, მიკროავტობუსით და მეტროთი. ამ დროს ტრანსპორტის ყველაზე პოლულარული სახეობა მიკროავტობუსი აღმოჩნდა (29%), შემდეგ მოდის ავტობუსი (23%) და მეტრო (16%).
თბილისის მოსახლეობის მეოთხედი (25%) საკუთარი, ოჯახის წევრის ან მეგობრის ავტომობილით სარგებლობს. ამასთან მანქანებით ძირითადად მამაკაცები გადაადგილდებიან (40%). რაც შეეხება ქალებს, მანქანას ქალების მხოლოდ 14% მართავს.
რაც შეეხება ტაქსის, გადაადგილების ძირითად ტრანსპორტს ის გამოკითხულთა მხოლოდ 2%-თვის წარმოადგენს.
ქალების უმრავლესობა (79%) საზოგადოებრივ ტრანსპორტს ირჩევს. ყველაზე ხშირად საზოგადოებრივი ტრანსპორტით 18-24 წლის თბილისელები სარგებლობენ.
კვლევა თბილისის მასშტაბით 7-9 ოქტომბერს შემთხვევითი შერჩევის გზით ჩატარდა. გამოკითხულია სულ 400 თბილისელი.
ACT — ანალიზისა და კონსულტაციების გლობალური კომპანიაა, რომელიც დსთ-ისა და აღმოსავლეთ ევროპის ქვეყნებს მოიცავს. კომპანიის ოფისები საქართველოში, აზერბაიჯანსა და ყაზახეთში მდებარეობს.
