თბილისი, 23 ოქტომბერი — Sputnik. მარნეულისა და ზუგდიდის ოთხ საარჩევნო უბანზე გამართულ საპარლამენტო არჩევნების განმეორებით კენჭისყრაში უფრო მეტმა მამაკაცმა მიიღო მონაწილეობა, ვიდრე ქალმა, განაცხადა ცესკოს პრეს-სპიკერმა ანა მიქელაძემ.
განმეორებითი კენჭისყრა გაიმართა ზუგდიდის რაიონის სოფელ ჯიხაშკარის №79 და №108, სოფელ განმუხურის №39 უბნებზე პროპორციული და მაჟორიტარული სისტემით და მარნეულის რაიონის სოფელ ყიზილაჯლოს №48 უბანზე – მხოლოდ მაჟორიტარული სისტემით.
„მარნეულის №48 —ე საარჩევნო უბანზე ამომრჩევლის საერთო რაოდენობიდან ქალი 296-ია, რაც პროცენტულად 38,6%-ია, ხოლო მამაკაცი 470, ანუ 61,4%… ზუგდიდის სამივე საარჩევნო უბანზე მთლიანობაში 650 ქალი გამოცხადდა, რაც ამომრჩევლის საერთო აროდენობის 44,27%-ია, ხოლო მამაკაცი 818 ანუ 55,7%“, — განაცხადა ანა მიქელაძემ.
რაც შეეხება ამომრჩევლის საერთო აქტივობას, 20:00 საათის მონაცემებით, მარნეულის №48-ე საარჩევნო უბანზე რეგისტრირებული 1436 ამომრჩევლიდან არჩევნებში მონაწილეობა მიიღო 766-მა, რაც ამომრჩეველთა 53.3%-ს შეადგენს.
რაც შეეხება ზუგდიდის რაიონის სამივე საარჩევნო უბანს, აღნიშნულ უბნებზე დარეგისტრირებული ამომრჩევლის 51,6%-მა მიიღო მონაწილეობა.
საარჩევნო უბნები 20:00 საათისთვის დაიხურა.
წინასწარი მონაცემებით, ცესკო არჩევნების განმეორებითი კენჭისყრის შედეგებს 24:00 საათზე გამოაქვეყნებს.
საპარლამენტო არჩევნები საქართველოში 8 ოქტომბერს ჩატარდა. განმეორებითი არჩევნების გამართვა სერიოზული დარღვევების გამო გახდა აუცილებელი.
ყიზილაჯლოს საარჩევნო უბანზე არჩევნები საარჩევნო უბნის მიმდებარედ არეულობის გამო შეწყდა, ხოლო ჯიხაშკარისა და განმუხურის უბნები ხმების დათვლის დროს დაარბიეს.