თბილისი, 9 ნოემბერი — Sputnik. ავიალაინერ А321-ის ავიაკატასტროფის შედეგად დაღუპულთა სხეულის ნაწილების ექსპერტიზა ინტენსიურ რეჟიმში მიმდინარეობს, ამ დროისათვის 100-ზე მეტი გარდაცვლილის იდენტიფიცირება უკვე მოხდა, განაცხადა მედიასთან რუსეთის ვიცე-მერმა ოლგა გოლოდეცმა.
რუსეთის ჯანდაცვის სამინისტრომ პარასკევს, 6 ნოემბერს განცხადება გაავრცელა, რომელშიც ნათქვამი იყო, რომ ეგვიპტეში მომხდარი კატასტროფის შედეგად 224 გარდაცვლილიდან 58-ს ექსპერტიზა უკვე ჩაუტარდა.
„ექსპერტიზა ძალზე ინტენსიურად მიმდინარეობს. დღეს ყველა მოწინავე ძალაა მობილიზებული, ისინი სანკტ-პეტერბურგში იმყოფებიან…რამდენადაც ვიცი, 100-მდე ცხედრის იდენტიფიცირება უკვე მოხერხდა“, — განაცხადა გოლოდეცმა.
რუსეთისა და საბჭოთა ავიაციის ისტორიაში ყველაზე დიდი ავიაკატასტროფა მოხდა შაბათს. ავიაკომპანია „კოგალიმავიას“ ლაინერი Airbus А321, რომელიც შარმ-ელ-შეიხიდან სანკტ-პეტერბურგში მიფრინავდა, სინაის ნახევარკუნძულზე ეგვიპტეში ჩამოვარდა. თვითმფრინავის ბორტზე 217 მგზავრი და ეკიპაჟის 7 წევრი იმყოფებოდა. ავიაკატასტროფას ვერავინ გადაურჩა.