თბილისი, 26 ოქტომბერი – Sputnik. აშშ-ის პრეზიდენტობის კანდიდატმა დონალდ ტრამპმა სირიასთან მიმართებით მისი მოწინააღმდეგე ჰილარი კლინტონის პოლიტიკაში მესამე მსოფლიო ომის საშიშროება დაინახა, იუწყება სააგენტო „რია ნოვოსტი“ სააგენტო „როიტერზე“ დაყრდნობით.
„რაც ჩვენ უნდა გავაკეთოთ – ეს „ისლამურ სახელმწიფოზე“ ფოკუსირებაა. ჩვენ არ გვჭირდება სირიის საკითხს განსაკუთრებული მნიშვნელობა მივანიჭოთ. თუ ჰილარი კლინტონს მოვუსმენთ, სირიის გამო ყველაფერი მესამე მსოფლიო ომით დასრულდება“, — განაცხადა მილიარდერმა სააგენტოსთან ინტერვიუში.
„თქვენ მარტო სირიასთან აღარ იბრძვით, თქვენ იბრძვით სირიასთან, რუსეთთან და ირანთან, მეთანხმებით? რუსეთი — ეს ბირთვული ქვეყანაა, თუმცა ქვეყანა, სადაც, სხვა ქვეყნებისგან განსხვავებით, რომლებიც მხოლოდ ლაპარაკობენ, ბირთვული იარაღი მუშაობს“, — დაამატა ტრამპმა.
სირიაზე საუბრისას ტრამპმა ასევე აღნიშნა, რომ პრეზიდენტი ბაშარ ასადი გაცილებით ძლიერი გახდა, ვიდრე სამი წლის წინ იყო.
„ასადი, „ისლამური სახელმწიფოს“ შემდეგ, ჩემთვის მეორე ადგილზეა“, — განმარტა მან.
აშშ-ში საპრეზიდენტო არჩევნები 8 ნოემბერს გაიმართება. უმეტესობა გამოკითხვების შედეგების თანახმად, ჯერჯერობით დემოკრატი ჰილარი კლინტონი ლიდერობს.
