თბილისი, 24 ოქტომბერი — Sputnik. მსუბუქძრავიანი თვითმფრინავი, რომლის ბორტზეც, სავარაუდოდ, ევროკავშირის სასაზღვრო სამსახურის თანამშრომლები იმყოფებოდნენ, მალტაში ჩამოვარდა, გარდაცვლილია ხუთი ადამიანი, იუწყება სააგენტო „რია ნოვოსტი“ გაზეთ Times of Malta-ზე დაყრდნობით.
წყაროს ინფორმაციით, ლუქსემბურგული თვითმფრინავი იჯარით Frontex-ის თანამშრომლებისთვის (ევროკავშირის სასაზღვრო სააგენტო) იყო გადაცემული.
თუმცა, სააგენტოს წარმომადგენლებმა განაცხადეს, რომ აღნიშნული თვითმფრინავით მათ თანამშრომლებს არ უსარგებლიათ.
გამოცემის თანახმად, თვითმფრინავმა Metroliner-მა კატასტროფა მალტის აეროპორტში აფრენიდან რამდენიმე წუთში განიცადა. ვრცელდება ინფორმაცია, რომ თვითმფრინავი რეისს ლიბიის მისრატის მიმართულებით ახორციელებდა.
თვითმხილველების განცხადებით, ავიაკატასტროფა ერთ-ერთი ადგილობრივი სამხედრო დანაყოფიდან 10 მეტრში მოხდა.
მომხდარი ფაქტის შედეგად ბორტზე მყოფი ადამიანების გარდა არავინ დაზარალებულა.