თბილისი, 25 ოქტომბერი — Sputnik. კომპანია „თბილსერვის ჯგუფი“ 2017 წლიდან თბილისში დიდი ტევადობის ნაგვის მიწისქვეშა კონტეინერების დადგმას გეგმავს, რაც გააუმჯობესებს ქალაქში ჰიგიენის პირობებს.
ნაგვის მიწისქვეშა კონტეინერს შახტაში სპეციალური ლიფტით ჩაუშვებენ, ხოლო ზედაპირზე მხოლოდ ნაგვის მიმღები დარჩება, რომელიც ჩვეულებრივი პრინციპით იმუშავებს.
„მიწისქვეშა კონტეინერების განთავსება გვინდა ისეთ ადგილებში, სადაც მჭიდრო მოძრაობა და პარკინგის პრობლემაა. ამ ნაგვის ურნების დაცლა ყოველი 2-3 საათის ნაცვლად 3-4 დღეში იქნება საჭირო. ეს მომავლის პროექტია და გვინდა, რომ მომავალი წლიდან განვახორციელოთ“, — განაცხადა „თბილსერვის ჯგუფის“ დირექტორის მოადგილემ დავით დოლიძემ ტელეარხ „პალიტრანიუსის“ ეთერში.
ამჟამად თბილისს ქალაქის დასუფთავებისთვის 290-ზე მეტი ერთეული სპეცტექნიკა ემსახურება.
გარდა ამისა, „თბილსერვის ჯგუფმა“ მთელ ქალაქში 10 ათასზე მეტი ნაგვის ახალი კონტეინერი დააყენა. ამჟამად თბილისში 18,9 ათასზე მეტი კონტეინერია.