თბილისი, 11 აგვისტო — Sputnik. აბიტურიენტებს, რომლებმაც წარმატებით ჩააბარეს ერთიანი ეროვნული გამოცდები, 11 აგვისტოს 18:00 საათამდე კიდევ შეუძლიათ შეცვალონ მანამდე არჩეული ფაკულტეტი, ნათქვამია გამოცდებისა და შეფასებების ეროვნული ცენტრის "ფეისბუქის" ოფიციალურ გვერდზე.
გამოცდების ეროვნული ცენტრი მოუწოდებს აბიტურიენტებს, გამოიჩინონ ყურადღება: საიტებზე online.naec.ge და www.naec.gov.ge განთავსებულ სარეიტინგო ჩამონათვალში ცვლილებების შეტანის შემდეგ მათ აუცილებლად უნდა მიიღონ შეტყობინება ელექტრონული ფოსტით. წინააღმდეგ შემთხვევაში შეტანილი ცვლილებები არ დაფიქსირდება.
დღეს, დღის ბოლოს ასევე იწურება გამოცდების შედეგების გასაჩივრების ვადა.
სააპელაციო სარჩელის ღირებულება 50 ლარია. თუ კომისია აბიტურიენტს ქულათა რაოდენობას მის სასარგებლოდ შეუცვლის, თანხა უკან დაუბრუნდება.
