თბილისი, 27 ივლისი — Sputnik. საქართველოს პრეზიდენტი გიორგი მარგველაშვილი და ქვეყნის პირველი ქალბატონი მაკა ჩიჩუა, ოლიმპიური ნაკრების მხარდაჭერის მიზნით, სპორტსმენებისთვის შექმნილ სამოსში გამოეწყვნენ, რითიც მათდამი მხარდაჭერა გამოხატეს.
ქართველ ოლიმპიელთა ჩაცმულობას მწვავე რეაქცია მოჰყვა საზოგადოებაში. ინტერნეტსივრცე გადაავსო მომხმარებლების ნეგატიურმა შეფასებებმა, რომლებიც ოლიმპიელთა კოსტიუმებს უგემოვნოდ, ძველმოდურად და არასპორტულად მიიჩნევენ.
„გამარჯვება, ქართველო ოლიმპიელებო!" — ასეთი მიმართვა დაურთო მაკა ჩიჩუამ საკუთარ "ფეისბუქის" გვერდზე გამოქვეყნებულ ფოტოებს.
სურათები პრეზიდენტის დუშეთის სახლის ფონზეა გადაღებული.
კოსტიუმების შემქმნელი კომპანია „სამოსელი პირველი“ ირწმუნება, რომ ოლიმპიელთა ჩაცმულობაში უძველესი ეროვნული ელემენტები აქვთ გამოყენებული, თუმცა ქართული საზოგადოება ამან ვერ დაამშვიდა და პეტიციაც კი დაიწერა ოლიმპიელთა ფორმის შეცვლის მოთხოვნით.