თბილისი, 26 ივლისი — Sputnik. რუსეთის პრეზიდენტ ვლადიმირ პუტინისა და თურქეთის პრეზიდენტ რეჯეფ თაიიფ ერდოღანის შეხვედრა სანკტ-პეტერბურგში 9 აგვისტოს გაიმართება, იუწყება რუსეთის სახელმწიფო მეთაურის პრეს-მდივანი დმიტრი პესკოვი.
„ეს ვიზიტი 9 აგვისტოს გაიმართება და როგორც ჩვენ ველოდებით, შეხვედრა სანკტ-პეტერბურგში ჩატარდება“, — განაცხადა პესკოვმა.
პუტინის პრეს-მდივნის განმარტებით, შეხვედრის გამართვისთვის სანკტ-პეტერბურგი ერთ-ერთი ვარიანტი იყო, რომელსაც თურქეთის პრეზიდენტი დათანხმდა.
ორი ქვეყნის პირველი პირის შეხვედრამდე „როსსელხოზნადზორისა“ და ტურისტული სფეროს წარმომადგენლები თურქეთს მოინახულებენ, განაცხადა ჟურნალისტებთან შეხვედრისას რუსეთის ვიცე-პრემიერმა არკადი დვორკოვიჩმა.
„ორი ქვეყნის ლიდერის შეხვედრამდე, უახლოეს დღეებში, ტურისტული და „როსსელხოზნადზორის“ მიმართულებით ექსპერტებმა უნდა მოახერხონ თურქეთში გამგზავრება და დაგეგმილი შეხვედრის გამართვამდე შესაბამისი შეფასებების გაკეთება“, — განაცხადა დვორკოვიჩმა.
